افتتح مقهى جديد في منطقة بيت ساحور بالضفة الغربية يقدم لزبائنه المشروبات والنرجيلة وأوراق اللعب. والمقهى الوردي مخصص للنساء فقط رغم أن صاحبيه رجلان.

وقال جورج خير أحد الشقيقين اللذين يملكان المقهى "هاي الفكرة إجيت فيها أنا واخوي، طبعا يلي بده يعمل مشروع لازم يدور على كل إشي يكون ناقص في المجتمع. فدورنا على أكثر إشي ناقص في هذا المجتمع يلي مش موجود، خصوصا في الظروف يلي إحنا فيها، كنا يلي عملنا يلي هو البينك كافيه (المقهى الوردي) قهوة تكون بس للبنات، فش فيها ولا أي نوع من الشباب وإشي، يكون فيها بس بنات إن نخلي البنت تاخد راحتها تكون كلشي تمام بكل اريحية."

والمقهى الذي يفتح أبوابه طوال الأسبوع للنساء فقط يفتح يوما واحدا في الأسبوع "للعائلات".

ويقول خير متحدثا من مكتبه "سويت يوم في الاسبوع مختلط، هذا اليوم في الأسبوع المختلط حتى إن الزلمة أبو البنت يلي مش مطمن وين بجيب بنته، ييجي هو ومرته هو وبنته، يعني حسب كيف الوضع، ييجي يتفرج، يشوف كيف الوضع، يجرب المطعم، يجرب آلية العمل هون، حتى يكون بكل ارياحية للبنت، أبوها يكون مطمن هي وين."

ويشغل المقهى النساء فقط أيضا مما يتيح فرص عمل للنساء في المنطقة.

وتقول شادن أبو الزلف التي تعمل بالمقهى "الحمد لله، مبسوطة، هاد إشي جديد على البلد. أول إشي في المحافظة بيسير عندنا. هذا تقدم منيح، صار في عندنا إشي للصبايا وهذا إشي بفرح بما إن إحنا مجتمع مش كثير مساعد للصبايا فالحمد لله الفكرة كثير منيحة."

اما الزبائن من النساء فتقول الكثيرات منهن إن ما يجذبهن للمكان إن بامكانهن قضاء وقت مع صديقاتهن والحديث في أي موضوع بحرية مع نساء أخريات.

وتقول ويصال خير إحدى زبائن المقهى "بمحل خاص إلهم، بيشكوا بيفضفضوا يلي في قلبهم، وبكونوا مش حاملين هم إن حد يسمع يعني. بينما إن لما يكونوا بمحل مختلط اكيد إن طبعا بيكون في بيضلهم في حذر، ان يحكوا يلي بدهم يقولوه، عرفتي كيف؟ فحلو يعني الفكرة حلوة."

وقالت زبونة أخرى هي ميرنا بنورة "مشاء الله الكافية بجنن كثير حلو، ألوانه حلوة. عجبتني الفكرة طبعا لأنه بيخلي يكون للبنات محل يروحوا عليه مش بس الشباب يكون إلهم محلات، برضوا خلي البنات كمان يكون إلهم كافيه."

وقبل افتتاح المقهى الوردي أجرى الشقيقان دراسة سوق عبر وسائل التواصل الاجتماعي على الانترنت واستطلعا أراء النساء في أن يكون لهن مقهى خاص بهن. لكن لم تسعد هذه الفكرة الجميع. فبعض سكان المنطقة يعارضون المقهى ويقول آخرون إن هذه طريقة لتكريس التمييز بين الجنسين في مجتمع مازال يخضع للسلطة الأبوية.

رويترز